Kush jam unë?

Lajla Pernaska, është lindur e rritur në Tiranë. Arsimimi filloi tek shkolla 8-vjeçare Mihal Grameno, më tej në Gjimnazin “Ismail Qemali” (Medalje e Artë) dhe u diplomua me rezultate të larta për Mjekësi të Përgjithshme në Fakultetin e Mjekësisë, Universiteti i Tiranës.
Në vitet 1989-1993 bëri specializim për Pediatri të Përgjithshme, në Universitetin Paris V, në Francë. Diplomohet në Universitetin e Lorraine për “Shëndetësinë & Zhvillimin”. Bëri studime Master për Integrimin Europian në Universitetin e Tiranës.

Dha një kontribut në zhvillimet demokratike në vend, duke u angazhuar me Reformën e Shëndetësisë, si Këshilltare e Ministrit të Shëndetësisë. Gjithashtu angazhohet në jetën politike, si mbështetëse e PD, që nga zgjedhjet Parlamentare të vitit 1996.
Përfshihet si aktiviste me lëvizjen për përmirësimin e statusit të gruas dhe barazisë gjinore në vend, duke drejtuar Federatën e Gruas Shqiptare. Punon si konsulente me PNUD, OBSH, UNICEF, si edhe Koordinatore Kombëtare e Gender-Task Force të Paktit të Stabilitetit.
Më 2005 dhe 2009 fitoi 2 herë mandatin si deputete në Qarkun e Tiranës, duke garuar në Njësinë nr. 2 në Tiranë.
Si anëtare e delegacionit shqiptar në Këshillin e Europës (Council of Europe), u zgjodh Kryetare e Komisionit të Shëndetësisë & Çështjeve sociale në Asamblenë Parlamentare të Këshillit të Europës PACE, (e vetmja shqiptare deri më sot në këtë pozicion), anëtare e Komitetit drejtues dhe Byrosë parlamentare. Në grupin politik të Partive Popullore Europiane (PPE), u zgjodh Zv.Presidente e këtij grupi.
Vazhdon aktivizmin civil, si eksperte/ trajnere e barazisë gjinore dhe integrimit europian, konsulente e “Prospect Albania”, anëtare e Aleancës Ndërkombëtare të Grave.

Në zgjedhjet vendore 2023, garon si kandidate për Kryetare e Bashkisë Tiranë.